திருப்பூர் மாவட்டத்தில் இடம் பெற்றுள்ள தாராபுரம் சட்டமன்ற தொகுதியில் ஆதிதிராவிட மக்கள் அதிகம் இருப்பதால் கடந்த 1967-ம் ஆண்டு தனித்தொகுதியாக அறிவிக்கப்பட்டது. அதுமுதல் 49 ஆண்டுகளாக தனித் தொகுதியாகவே...

திருப்பூர் மாவட்டத்தில் இடம் பெற்றுள்ள தாராபுரம் சட்டமன்ற தொகுதியில் ஆதிதிராவிட மக்கள் அதிகம் இருப்பதால் கடந்த 1967-ம் ஆண்டு தனித்தொகுதியாக அறிவிக்கப்பட்டது. அதுமுதல் 49 ஆண்டுகளாக தனித் தொகுதியாகவே இருந்து வருகிறது. தாராபுரம் தொகுதியில் தாராபுரம் ஊராட்சி ஒன்றியத்தில் உள்ள 10 ஊராட்சிகள், தாராபுரம் நகராட்சி மற்றும் சின்னக்காம்பாளையம் பேரூராட்சி, குடிமங்கலம் ஊராட்சி ஒன்றியம், மடத்துக்குளம் ஊராட்சி ஒன்றியத்தில் உள்ள 9 ஊராட்சிகள் இடம் பெற்று இருந்தன. கடந்த 2008-ம் ஆண்டு தொகுதி மறுசீரமைப்பு செய்யப்பட்டபோது, வெள்ளகோவில் சட்டமன்ற தொகுதி, பொங்கலூர் சட்டமன்ற தொகுதி ஆகியவை நீக்கப்பட்டு, அதில் இருந்த பகுதிகள் தாராபுரம் சட்டமன்ற தொகுதியுடன் இணைக்கப்பட்டன. மேலும் காங்கேயம் தொகுதியில் இருந்து சில பகுதிகளும் தாராபுரம் தொகுதியுடன் இணைக்கப்பட்டன. அதே நேரம் தாராபுரம் தொகுதியில் இருந்து சில பகுதிகள் மடத்துக்குளம் தொகுதியுடன் இணைக்கப்பட்டன. தற்போது தாராபுரம் தொகுதியில் தாராபுரம் தாலுகாவுக்கு உட்பட்ட தாராபுரம் நகராட்சியின் 30 வார்டுகள், குளத்துப்பாளையம் பேரூராட்சியின் 18 வார்டுகள், சின்னக்காம்பாளையம் பேரூராட்சியின் 15 வார்டுகள், மூலனூர் பேரூராட்சியின் 15 வார்டுகள், கன்னிவாடி பேரூராட்சியின் 12 வார்டுகள், ருத்ராவதி பேரூராட்சியின் 15 வார்டுகள், குண்டடம் ஊராட்சி ஒன்றியத்தில் உள்ள 24 ஊராட்சிகள், தாராபுரம் ஊராட்சி ஒன்றியத்தில் உள்ள 16 ஊராட்சிகள், மூலனூர் ஊராட்சி ஒன்றியத்தில் உள்ள 12 ஊராட்சிகள், வெள்ளகோவில் ஊராட்சி ஒன்றியத்துக்கு உட்பட்ட புதுப்பை ஊராட்சி ஆகிய பகுதிகள் வருகின்றன. தாராபுரம் தொகுதியில் ஆதிதிராவிட மக்களுக்கு அடுத்த படியாக கவுண்டர் சமூகத்தினரும், நாயுடு, வன்னியர், செட்டியார், முதலியார், ஆசாரி, முக்குலத்தோர் போன்றவர்களும் பரவலாக உள்ளனர்.