தூத்துக்குடி மாவட்டத்தில் தூத்துக்குடிக்கு அடுத்தபடியாக 2-வது பெரிய நகரமாக கோவில்பட்டி விளங்குகிறது. தீப்பெட்டி தொழிற்சாலைகள், நூற்பாலைகள் அதிகம் உள்ளன. கோவில்பட்டி சட்டசபை தொகுதியில் கரிசல்...

தூத்துக்குடி மாவட்டத்தில் தூத்துக்குடிக்கு அடுத்தபடியாக 2-வது பெரிய நகரமாக கோவில்பட்டி விளங்குகிறது. தீப்பெட்டி தொழிற்சாலைகள், நூற்பாலைகள் அதிகம் உள்ளன. கோவில்பட்டி சட்டசபை தொகுதியில் கரிசல் நிலப்பரப்பில் மானாவாரி விவசாயமே பிரதானமாக நடைபெற்று வருகிறது. பருத்தி, கம்பு, சோளம், பாசிப்பயறு, உளுந்து, மக்காச்சோளம் போன்றவற்றையே விவசாயிகள் பயிரிடுகின்றனர். ஆண்டு முழுவதும் விவசாயம் நடைபெறாததால், பெண்கள் தீப்பெட்டி தொழிலையே சார்ந்து உள்ளனர். பகுதி எந்திர தொழிற்சாலையில் உற்பத்தி செய்யப்படும் தீப்பெட்டிகள் வெளி மாநிலங்களுக்கு அனுப்பப்படுகின்றன. தீப்பெட்டி தொழிலுக்கு மத்திய அரசின் கலால் வரி விலக்கு அளிக்க வேண்டும் என்று நீண்ட காலமாக கோரிக்கை விடுத்து வருகின்றனர். கோவில்பட்டி சட்டமன்ற தொகுதியில் கோவில்பட்டி நகரசபையும், கயத்தாறு, கடம்பூர், கழுகுமலை ஆகிய நகர பஞ்சாயத்துகளும், கோவில்பட்டி யூனியன் மற்றும் கயத்தாறு யூனியனில் உள்ள கிராமங்களும் அமைந்துள்ளன. கோவில்பட்டி மக்களின் நீண்டநாள் கோரிக்கையான அரசு கல்லூரி ரூ.7 கோடியே 25 லட்சம் செலவில் கதிரேசன் கோவில் மலை அடிவாரத்தில் கட்டி முடிக்கப்பட்டு உள்ளது. மேலும் அதன் அருகில் ரூ.7 கோடி செலவில் சர்வதேச தரத்துடன் செயற்கை புல்வெளியுடன் கூடிய ஆக்கி மைதானம் அமைக்கப்பட்டு உள்ளது. ரூ.81 கோடியே 82 லட்சம் செலவில் நடைபெற்று வரும் 2-வது பைப்- லைன் குடிநீர் திட்டத்துக்கு கூடுதல் நிதியாக ரூ.6 கோடியை அரசு அனுமதித்து பணிகள் நடந்து வருகின்றன.