2011-ல் தொகுதி சீரமைப்புக்குபின் கடலாடி தொகுதி நீக்கப்பட்டு அதன் பெரும் பகுதி முதுகுளத்தூர் சட்டமன்ற தொகுதியுடனும், ராமநாதபுரம் சட்டமன்ற தொகுதியுடனும் இணைக்கப்பட்டுள்ளன. தற்போது இந்த தொகுதியில்...

2011-ல் தொகுதி சீரமைப்புக்குபின் கடலாடி தொகுதி நீக்கப்பட்டு அதன் பெரும் பகுதி முதுகுளத்தூர் சட்டமன்ற தொகுதியுடனும், ராமநாதபுரம் சட்டமன்ற தொகுதியுடனும் இணைக்கப்பட்டுள்ளன. தற்போது இந்த தொகுதியில் முதுகுளத்தூர், கடலாடி தாலுகா பகுதிகளும், கமுதி பேரூராட்சி பகுதிகளும், கமுதி தாலுகாவில் முடிமன்னார்கோட்டை, நீராவி, என்.கரிசல்குளம், மேலராமநதி, கீழராமநதி, கே.நெடுங்குளம், ஆனையூர், பாக்குவெட்டி, செங்கப்படை, முதல்நாடு, முஷ்டக்குறிச்சி, சீமனேந்தல், புதுக்கோட்டை, பேரையூர், கள்ளிக்குளம், ஓ.கரிசல்குளம், கே.வேப்பங்குளம், பம்மனேந்தல், மாவிலங்கை, அரிமங்கலம், கோவிலாங்குளம், கொம்பூதி, வில்லானேந்தல், எம்.புதுக்குளம், இடிவிலகி, பொந்தம்புளி, திம்மநாதபுரம், டி.வாலசுப்பிரமணியபுரம், பி.முத்துராமலிங்கபுரம், பெருநாழி, சடையனேந்தல், சாம்பக்குளம், கமுதி,தவசிக்குறிச்சி மற்றும் காடமங்கலம் வருவாய்கிராமங்கள் அடங்கி உள்ளன. முதுகுளத்தூர் சட்டமன்ற தொகுதி மாவட்டத்தில் அதிக வாக்காளர்களை கொண்ட தொகுதியாகும். நீண்டகடற்கரையை கொண்ட தொகுதியாகும். ஆனால் மீன்பிடி தொழில் கூறும்படி இல்லை. மூக்கையூரில் துறைமுகம் அமைப்பதற்கான ஆயத்த பணிகள் மட்டுமே மேற்கொள்ளப்பட்டுள்ளன. முதுகுளத்தூர் தொகுதிக்கு உட்பட்ட மாரியூர் கடற்கரை ஆன்மிக தலமாகவும் போற்றப்படுகிறது. இந்த கடற்கரையில் பக்தர்கள் புனித நீராடி அங்குள்ள பூவேந்தியநாதர் கோவிலில் பூஜைகள் செய்து வழிபடுவது வழக்கம். இதேபோல சாயல்குடி அருகே அமைந்துள்ள உய்யவந்த அம்மன் கோவில், காணிக்கூரில் அமைந்துள்ள பாதாள காளியம்மன் கோவில் ஆகியவை பிரசித்தி பெற்றவையாகும்.