தர்மபுரி மாவட்டத்தில் புதிய சட்டசபை தொகுதியான பாப்பிரெட்டிப்பட்டி கடந்த 2011-ம்ஆண்டு முதல் தேர்தலை சந்தித்தது. தொகுதி சீரமைப்பின்படி மொரப்பூர் தொகுதியை நீக்கி புதிதாக உருவாக்கப்பட்டது. இந்த...

தர்மபுரி மாவட்டத்தில் புதிய சட்டசபை தொகுதியான பாப்பிரெட்டிப்பட்டி கடந்த 2011-ம்ஆண்டு முதல் தேர்தலை சந்தித்தது. தொகுதி சீரமைப்பின்படி மொரப்பூர் தொகுதியை நீக்கி புதிதாக உருவாக்கப்பட்டது. இந்த தொகுதியில், பாப்பிரெட்டிப்பட்டி ஊராட்சி ஒன்றியம், பொ.மல்லாபுரம், கடத்தூர், பாப்பிரெட்டிப்பட்டி ஆகிய பேரூராட்சிகள், தர்மபுரி ஒன்றியத்திற்குட்பட்ட பழைய தர்மபுரி, அன்னசாகரத்தில் ஒரு பகுதி செட்டிகரை ஊராட்சி உள்ளிட்ட பகுதிகள் மொரப்பூர் ஒன்றியத்திற்குட்பட்ட சில பகுதிகள் இணைந்துள்ளன. மொரப்பூர் ஒன்றியத்தை பிரித்து கடத்தூரை தலைமையிடமாக கொண்ட புதிய ஒன்றியத்தை உருவாக்க அறிவிப்பு வெளியிடப்பட்டு உள்ளது. பாப்பிரெட்டிப்பட்டி சட்டமன்ற தொகுதியில் வன்னியர் சமூகத்தினர் அதிக அளவில் வசிக்கிறார்கள். கொங்குவேளாளக்கவுண்டர், முதலியார், செட்டியார், நாடார், ஆதிதிராவிடர், மலைவாழ்மக்கள் உள்ளிட்ட பிற சமூகத்தினரும் கணிசமாக வசிக்கிறார்கள். இவர்கள் தவிர கிறிஸ்தவர்கள் மற்றும் முஸ்லிம்கள் குறிப்பிடத்தக்க அளவில் இந்த தொகுதியில் வசிக்கிறார்கள். பாப்பிரெட்டிப்பட்டி தொகுதியில் வசிக்கும் மக்களின் முக்கிய தொழில் விவசாயம் ஆகும். இந்த தொகுதியில் மரவள்ளிக்கிழங்கு, கரும்பு, நெல், கேழ்வரகு, சிறுதானியங்கள் அதிக அளவில் பயிரிடப்படுகின்றன. வாணியாறு அணை இந்த தொகுதியை சேர்ந்த விவசாயிகளுக்கு மிக முக்கிய நீராதாரமாக உள்ளது.