ஆர்.கே. நகர் தொகுதியுடன், தொகுதி மறுசீரமைப்பின்போது ராயபுரம் தொகுதியில் இருந்த 14-வது வட்டம் கடந்த சட்டமன்ற தேர்தலுக்கு முன்பு சேர்க்கப்பட்டது. அதேபோல், ஆர்.கே. நகர் தொகுதியில் இருந்த சில பகுதிகள்...

ஆர்.கே. நகர் தொகுதியுடன், தொகுதி மறுசீரமைப்பின்போது ராயபுரம் தொகுதியில் இருந்த 14-வது வட்டம் கடந்த சட்டமன்ற தேர்தலுக்கு முன்பு சேர்க்கப்பட்டது. அதேபோல், ஆர்.கே. நகர் தொகுதியில் இருந்த சில பகுதிகள் ராயபுரம் தொகுதிக்கு மாற்றப்பட்டது. இங்கு, 2011-ம் ஆண்டு நடந்த சட்டமன்ற தேர்தலின்போது, அ.தி.மு.க. வேட்பாளராக போட்டியிட்ட பி. வெற்றிவேல் 83,777 வாக்குகள் பெற்று வெற்றி பெற்றார். அவரை எதிர்த்து போட்டியிட்ட தி.மு.க. வேட்பாளர் பி.கே. சேகர்பாபு 52,522 ஓட்டுகள் வாங்கினார். ஆர்.கே. நகர் தொகுதி எம்.எல்.ஏ.வாக இருந்த பி.வெற்றிவேல், கடந்த ஆண்டு (2015) மே மாதம் 17-ந்தேதி திடீரென தனது எம்.எல்.ஏ. பதவியை ராஜினாமா செய்தார். அதனைத்தொடர்ந்து, காலியாக இருந்த அந்தத் தொகுதிக்கு ஜூன் மாதம் 27-ந்தேதி இடைத்தேர்தல் நடத்தப்பட்டது. அ.தி.மு.க. சார்பில் அக்கட்சியின் பொதுச் செயலாளரும், தற்போதைய முதல்-அமைச்சருமான ஜெயலலிதா போட்டியிட்டார். இந்த இடைத்தேர்தலை தி.மு.க. புறக்கணித்தது. இந்திய கம்யூனிஸ்டு கட்சி சார்பில் சி.மகேந்திரன் களம் கண்டார். இந்த இடைத்தேர்தலில் அ.தி.மு.க. வேட்பாளர் ஜெயலலிதா 1,60,432 வாக்குகள் பெற்றதுடன், 1,50,722 வாக்குகள் வித்தியாசத்தில் அமோக வெற்றி பெற்றார். அவரை எதிர்த்து போட்டியிட்ட இந்திய கம்யூனிஸ்டு வேட்பாளர் சி.மகேந்திரன் 9,710 ஓட்டுகள் மட்டுமே வாங்கினார்.