குடியாத்தம் சட்டமன்ற தொகுதிக்கு பல்வேறு சிறப்புகள் உள்ளன. 1947-ம் ஆண்டு ஆகஸ்டு 15-ந்தேதி இந்தியா சுதந்திரம் அடைந்தபோது டெல்லி செங்கோட்டையில் ஏற்றப்பட்ட இந்திய தேசிய கொடி குடியாத்தத்தில்...

குடியாத்தம் சட்டமன்ற தொகுதிக்கு பல்வேறு சிறப்புகள் உள்ளன. 1947-ம் ஆண்டு ஆகஸ்டு 15-ந்தேதி இந்தியா சுதந்திரம் அடைந்தபோது டெல்லி செங்கோட்டையில் ஏற்றப்பட்ட இந்திய தேசிய கொடி குடியாத்தத்தில் நெய்யப்பட்டது. பெருந்தலைவர் காமராஜரை எம்.எல்.ஏ. தேர்தலில் வெற்றி பெற வைத்து முதல்-அமைச்சர் பதவியில் அமர்த்தி அழகு பார்த்த தொகுதியாகும். குடியாத்தத்தில் தீப்பெட்டி தொழிற்சாலைகள் அதிக அளவில் உள்ளதால் குட்டி சிவகாசி என்ற சிறப்பும் உள்ளது. ஒலக்காசி கிராமத்தை சேர்ந்த ராம.தமிழ்ச்செல்வன் என்பவர் ஓவியர் வேணுகோபால்சர்மா என்பவர் மூலமாக திருவள்ளுவர் திருவுருவ படத்தை வரைந்து தமிழக அரசுக்கு வழங்கினார். அந்த படம்தான் தற்போதுள்ள திருவள்ளுவர் படம். மாவட்டத்திலேயே பெரிய அணையான மோர்தானா அணை குடியாத்தம் தொகுதியில் உள்ளது. பேரணாம்பட்டில் அன்னிய செலாவணி ஈட்டிதரும் ஏராளமான தோல் தொழிற்சாலைகள் உள்ளது. குடியாத்தம் தொகுதியில் குடியாத்தம் நகராட்சி, குடியாத்தம் ஊராட்சி ஒன்றியத்தில் 13 ஊராட்சிகள், பேரணாம்பட்டு நகராட்சி, பேரணாம்பட்டு ஊராட்சி ஒன்றியத்தை சேர்ந்த 34 ஊராட்சிகள், மாதனூர் ஊராட்சி ஒன்றியத்தை சேர்ந்த சோமலாபுரம் ஊராட்சி ஆகியவற்றை உள்ளடக்கி உள்ளது. குடியாத்தம் தொகுதியில் ஆதிதிராவிடர்கள், இஸ்லாமியர்கள், செங்குந்தமுதலியார்கள், வன்னியர்கள், நாயுடுகள் என அனைத்து சமுதாயத்தினரும் பெருமளவு உள்ளனர்.