திருவண்ணாமலை மாவட்டம் கலசபாக்கம் தொகுதியில் பிரசித்தி பெற்ற ஆன்மிக கோவில்கள் உள்ளன. கலசபாக்கம் சட்டமன்ற தொகுதியை பொறுத்தவரை விவசாயிகள், பால் உற்பத்தியாளர்கள், கரும்பு விவசாயிகள், நெசவாளர்கள், செங்கல் ...

திருவண்ணாமலை மாவட்டம் கலசபாக்கம் தொகுதியில் பிரசித்தி பெற்ற ஆன்மிக கோவில்கள் உள்ளன. கலசபாக்கம் சட்டமன்ற தொகுதியை பொறுத்தவரை விவசாயிகள், பால் உற்பத்தியாளர்கள், கரும்பு விவசாயிகள், நெசவாளர்கள், செங்கல் உற்பத்தி செய்யும் தொழிலாளர்கள் அதிகம் வசித்து வருகின்றனர். மேலும் இந்த தொகுதியில் மலைவாழ் மக்களும் வசித்து வருகின்றனர். அதிக கிராம பகுதிகளை கொண்ட இந்த தொகுதியில் பிரசித்தி பெற்ற ஆன்மிக கோவில்கள் பல உள்ளன. இதில் சிறப்பு வாய்ந்தவை தென்மாதிமங்கலத்தில் சுமார் 4,500 அடி உயரத்தில் உள்ள மூலிகை வாசம் கொண்ட பருவத மலை ஆகும். இங்கு மல்லிகார்ஜூனர் சாமி கோவில் உள்ளது. மேலும் படவேடு ரேணுகாம்பாள், புதூர் மாரியம்மன், பூண்டி மகான் ஆசிரமம் ஆகியவை குறிப்பிடத்தக்கதாகும். இந்த தொகுதியில் சுற்றுலா பகுதியாக ஜவ்வாதுமலை பகுதி, அமிர்தி, தென்மாதிமங்கலம் பருவதமலை, கலசபாக்கம் அருகில் உள்ள மிருகண்டா அணை, செண்பகத்தோப்பு அணை ஆகியவை உள்ளன. கலசபாக்கம், போளூர், செங்கம் ஆகிய 3 தாலுகா பகுதிகள், புதுப்பாளையம் பேரூராட்சி, 112 ஊராட்சிகள் இந்த தொகுதியில் அடங்கி உள்ளன. இந்த தொகுதியில் முதலியார் சமூகத்தை சேர்ந்தவர்கள் 50 சதவீதமும், வன்னியர் சமூகத்தை சேர்ந்தவர்கள் 25 சதவீதமும், இதர சமூகத்தை சேர்ந்தவர்கள் 25 சதவீதமும் உள்ளனர்.