ராணிப்பேட்டை தொகுதி தொழிற்பேட்டையை உள்ளடக்கியது. இந்த தொகுதி அரக்கோணம் பாராளுமன்ற தொகுதியில் உள்ளது. ராணிப்பேட்டை சட்டமன்ற தொகுதியில் ராணிப்பேட்டை, வாலாஜா, மேல்விஷாரம் ஆகிய 3 நகரசபைகளும், வாலாஜா...

ராணிப்பேட்டை தொகுதி தொழிற்பேட்டையை உள்ளடக்கியது. இந்த தொகுதி அரக்கோணம் பாராளுமன்ற தொகுதியில் உள்ளது. ராணிப்பேட்டை சட்டமன்ற தொகுதியில் ராணிப்பேட்டை, வாலாஜா, மேல்விஷாரம் ஆகிய 3 நகரசபைகளும், வாலாஜா ஒன்றியத்தில் உள்ள 36 கிராம பஞ்சாயத்துக்களும், ஆற்காடு ஒன்றியத்தில் உள்ள 14 கிராம பஞ்சாயத்துகளும், அம்மூர் பேரூராட்சியும் அடங்கியுள்ளது. ராணிப்பேட்டை நகரம் 30 வார்டுகளையும், வாலாஜா நகரம் 24 வார்டுகளையும், மேல்விஷாரம் நகரம் 21 வார்டுகளையும், அம்மூர் பேரூராட்சியில் 15 வார்டுகளும் உள்ளது. ராணிப்பேட்டை தொகுதியில் சிப்காட் என்ற முக்கிய தொழிற்பேட்டை அடங்கியுள்ளது. இங்கு பொதுத்துறை நிறுவனமான நவரத்னா அந்தஸ்து பெற்ற பெல் தொழிற்சாலை அமைந்துள்ளது. இந்த தொழிற்சாலையின் துணை தொழிலகங்களாக ஆன்சிலரி தொழிற்சாலைகள் ராணிப்பேட்டை தொகுதியில் பரவலான பகுதிகளில் அமைந்துள்ளது. மற்றவை சுற்று வட்டார பகுதிகளில் அமைந்துள்ளது. அதோடு மட்டுமல்லாமல் பல்வேறு கெமிக்கல் தொழிற்சாலைகளும், பீங்கான் உற்பத்தி தொழிற்சாலையும், பல்வேறு விதமான பொருட்களை உற்பத்தி செய்யும் தொழிற்சாலைகள், உதிரிபாகங்கள் உற்பத்தி செய்யும் தொழிற்சாலைகளும் சிப்காட் தொழிற்பேட்டை மற்றும் ராணிப்பேட்டை பகுதிகளில் அமைந்துள்ளது. மேலும் அன்னிய செலாவணியை ஈட்டி தரும் தோல் பொருட்கள் உற்பத்தி தொழிற்சாலைகளும், தோல் பதனிடும் தொழிற்சாலைகளும் இந்த தொகுதியில் பிரதான தொழிற்சாலைகளாக இயங்கி வருகின்றன. இந்தியாவிலேயே இரண்டாவதாக போடப்பட்ட வாலாஜா ரோடு ரெயில் நிலையம், தமிழகத்தின் முதல் நகரசபையான வாலாஜா நகரசபை, பழமை வாய்ந்த ஸ்கடர் மருத்துவமனை, பீட்டி மெமோரியல் ஆசிரியர் பயிற்சி நிறுவனம் ஆகியவையும் இந்த தொகுதியில் அமைந்துள்ளது. மேலும் வரலாற்று சின்னமான ராணிப்பேட்டை பெயர் வரக் காரணமான ராஜாதேசிங்கு, ராணி நினைவு சின்னமும் புகழ் பெற்ற பாலாற்றின் கரையில் உள்ளது. ஆசிய அளவில் புகழ் பெற்ற கால்நடைகளுக்கான மருந்துகள் தயாரிக்கும் ஐ.வி.பி.எம். மருந்து ஆராய்ச்சி நிலையம். 9 லட்சம் மரங்கள் இருந்தது என கூறப்படும் நவ்லாக் விவசாய பண்ணையும் இந்த தொகுதியில் அமைந்துள்ளது.